May 28 2009

وصفات بيتي من "نانيس سليم"

وصفات بيتي من "نانيس سليم
****************
تعتبر (الماسكات) من أهم مستحضرات التجميل، لكن من المهم أن تُختار بعناية شديدة لتناسب البشرة..

تنظيف البشرة لا غنى عنه وأمام البنات حل من اتنين، إما شراء ماسكات غالية جدا وماتعرفش تستخدمها، ولو كانت غير مناسبة ممكن تؤذي بشرتها... أما الحل التاني فهو الاستعانة بخبيرة تجميل وفي الحالتين هناك تكلفة قد لا يتحملها البعض منا...

"نانيس سليم" خبيرة التجميل..

هتساعدنا نعرف طريقة تحضير مجموعة من الماسكات الطبيعية وأنواع مختلفة من الغسول التي تناسب أنواع البشرة المختلفة.

أهمية عمل الماسكات؟

الماسكات مهمة جدا ولها فوائد كثيرة ومنها:

تحفيز الدورة الدموية في الجلد ودفع المواد السامة إلى سطحه التي نزيلها مع القناع؛ وبكده يكتسب الجلد بريقاً صحياً ونضارة ونعومة.

هناك أنواع من الماسكات تعالج تجاعيد الوجه وتعيد الحيوية والانتعاش إلي البشرة.

الماسك المخصوص للبشرة الدهنية بينقي الجلد الدهني ويجذب للبشرة الزيت الفائض وحين يجف القناع يتحد الدهن معه ويزول مع غسل الوجه بالماء.

وكمان الماسك يسهل انقباض الأنسجة وده بيخلي بشرة الوجه براقة لامعة.

أما الفائدة الكبيرة فهي أن الماسك بيحد من تبخر الماء الضروري لصحة البشرة وسلامتها فيبقي الماء بالطبقة العليا وهو يساعد على تقوية مفعول حمض الهيالورونيك اللي بيحجز الميّة في الجلد ويمنع جفاف البشرة.

هل الماسكات مفيدة في إزالة البقع؟

فيه أنواع من الماسكات بتعمل على إزالة البقع الداكنة وتنقي البشرة السمراء وبتخلي سطح الجلد صافيا ويبيض نتيجة التخلص من الخلايا الميتة التي تزول مع الماسك.

ازاي نحضّر أنواعا سهلة ومفيدة من الماسكات في البيت؟

تنظيف البشرة ممكن يتم في البيت وفيه وصفات سحرية لكل نوع بشرة، المهم معرفة نوع البشرة وعشان نبدأ صح لازم نستخدم حاجة تنظف بشرتنا قبل ما نحط الماسك... الحاجة دي اسمها غسول "فووم" وده ممكن نعمله في البيت..

ولكل بشرة غسول خاص.. يلاّ نبدأ بالبشرة العادية.. وأنصح أصحاب البشرة العادية بتنظيف بشرتهم بغسول اسمه "غسول النخالة".

طريقة تحضير الغسول!!

نستخدم "غسول النخالة" لتنظيف الوجه مساءً، فوائده إنه بينقي الوجه ويبيضه.

ومكوناته:
"نخالة" -وهي موجوده عند العطار-.
شوية مية..

أما طريقة التحضير فهي كالآتي:
انقعي القليل من النخالة في الماء لمدة 24 ساعة، وبعد كده اغلي المزيج لمدة ربع ساعة وبعد أن يهدأ في الوعاء احفظيه في عبوة يسهل عليكِ استخدامها. ونظفي بشرتك منه يوميا.

فيه غسول كمان حلو قوي مفيد اسمه "غسول الورد" لتنظيف الوجه صباحاً، وفوائده إنه يستخدم كغسول منعش للوجه.

ومكوناته:
لتر ماء
ماء ورد
ورد طبيعي معطر -موجود في محلات بيع الورد او محلات بيع منتجات نكتر-.

طريقة التحضير:
انقعي الورد بالماء لمدة 24 ساعة وبعد كده أضيفي إليه مقدار كوب من ماء الورد و3 نقاط من زيت اللوز، ضعي الغسول في التلاجة بعد تصفيته... واستخدميه كل يوم.

وللبشرة الدهنية..!!

أنصح أصحاب البشرة الدهنية باستخدام "غسول النعناع" لتنظيف بشرتهم..

وعشان تحضريه اغلي شوية من أوراق النعناع الطازجة وبعد أن تبرد اغسلي وجهك بميتها.
البشرة الدهنية ممكن تسخدم "غسول النخالة" و"غسول ماء الورد" ولكنه يستخدم باردا.

"غسول النشاء"... رائع مع البشرة الدهنية..

وطريقته: دوّبي مقدار ملعقة صغيرة من مسحوق النشاء في مقدار أربعة أكواب من الماء ولمّا يبدأ المزيج يتماسك اتركيه شوية وبعد كده اغسلي به وجهك.

ماسك العسل واللبن:


ازاي نحضر ماسكات سريعة ومفيدة للبشرة المرهقة؟

أنصح كل البنات بماسك "العسل واللبن" لتغذية البشرة وتنقيتها.

وطريقة التحضير: امزجي العسل واللبن مع بعضهم حتى يتماسك المزيج كويس وبعد كده افرديه على وجهك لمدة 10 دقائق، وبعدين اغسليه بالميه الفاترة.

ماسك النخالة:

ومكوناته:
كوب نخالة أو كوب دقيق ذرة.
كوب ماء أو كوب عصير خيار.
بياض بيضة مخفوقة مع قطرة ليمون.

طريقة تحضيره:
امزجي المكونات جيداً حتى تتماسك، وأضيفي إليه بعض مية الخيار لو المزيج تقيل، أما إذا كان طريا فيضاف إليه القليل من الدقيق.
ضعي الماسك على وجهك لمدة 10 دقائق وبعدين اغسليه بالمية الفاترة.

ماسك الفاكهة:

أما "ماسك الفاكهة" فهو مخصوص للبشرة الدهنية..

ومكوناته:
خمس حبات (فراولة)
ملعقة صغيرة من العسل، نقطتان من عصير الليمون + نقطتان من عصير البرتقال، ملعقة كبيرة من الدقيق.

طريقة تحضيره:
اهرسي الفراولة ثم أضيفي إليها العسل والليمون والبرتقال وبشكل تدريجي الدقيق.
افردي الماسك على وجهك لمدة سبع دقائق واغسليه بالمية الفاترة.
الماسك مفيد جدا لأنه يحتوي على الفيتامينات وخاصة فيتامين "C" المفيد للبشرة الدهنية.

ماسك عصير الخيار:

للبشرة الدهنية..

ومكوناته:
ملعقتان من عصير الخيار
ملعقتان من ماء الورد
قليل من زيت الزيتون
شوية دقيق

طريقة التحضير:
امزجي عصير الخيار مع ماء الورد وزيت الزيتون ثم أضيفي إليهم الدقيق ليتماسك الخليط.
اتركي الماسك على وجهك لمدة 10 دقائق واغسليه بالماء البارد.
الماسك ده بيساعد على ترطيب البشرة.

Tags: , , , , , , , , , , , , ,

May 28 2009

ماسكات طبيعية للبشرة المختلطة

ماسكات للبشرة المختلطة

******************

البشرة المختلطة بتجمع بين البشرة الجافة والدهنية وعلشان كده فأنسب أنواع الماسكات للبشرة هي دي..


ماسك الجزر
**********


المكونات:
½ جزرة متوسطة الحجم.
¼ ملعقة عسل نحل.

الطريقة:
قطعي نصف الجزرة شرائح واعصريها وصفيها، وبعد ما تحصلي على هذا العصير ضيفي إليه العسل واخلطي هذا الخليط، وادهني بيه وشك لمدة ربع ساعة، وبعد كده اغسلي وشك بالماء الدافئ.

والماسك ده مش بيرطب البشرة وبس، لا ده كمان بيغذي البشرة بفيتامين أ.


ماسك الورد
************


المكونات:
ورد ناشف.
عسل نحل.

الطريقة:
اطحني الورد واخلطيه بالعسل وحطيه على وشك ورقبتك لمدة نصف ساعة.

بس كده، دي كانت مجموعة من الماسكات يارب إنها تعجبكم، جربوها وعلقوا وقولوا لينا على النتيجة

Tags: , , , , , , , , , , ,

May 28 2009

ماسكات طبيعية للبشرة الحساسة

ماسكات للبشرة الحساسة
****************  
 

من اسمها كده يبقى بتتميز بحساسيتها الشديدة علشان كده نلاقي إن أنسب أنواع الماسكات اللي بتناسبها هي الماسكات دي، بس خلي بالك إن مدة الماسك على بشرتك لا تزيد عن عشر دقائق فقط، لأن البشرة دي مش محتاجة أكتر من كده، وكمان مش بتستحمل أكتر من كده.

 

ماسك الدقيق
**********


المكونات:
ملعقة كبيرة من الدقيق.
4 ملاعق كبيرة من ماء الورد.

الطريقة:
يتم خلط المكونات السابقة مع بعضها لغاية ما يكون على شكل عجينة لينة جدا توضع على الوجه والرقبة لمدة 10 دقائق، ثم تزال بقطعة قطن مبللة بماء الورد، ثم يغسل الوجه بالماء الفاتر.


ماسك عسل النحل الخالص
*************


المكونات:
5 ملاعق كبيرة من عسل النحل.

الطريقة:
مفيش أسهل من دي طريقة، وهي إنك تدهني وشك بالعسل النحل وتسيبيه على وشك لمدة 10 دقائق، وبعد كده تدلكي وجهك بأطراف أصابعك المبللة بعسل النحل، وتستمري في التدليك لمدة 3 دقائق، ويا سلام بقى على الانتعاش اللي هتحصلي عليه وإنت بتمرري قطعة من القطن مبللة بماء الورد. وبعد كده تغسلي وشك بالماء الفاتر.


ماسك الجليسرين

*************

المكونات:
2 ثمرة خيار.
جلسرين.
ملعقة دقيق كبيرة.

الطريقة:
اضربي الخيار في الخلاط، وبعد ما تضربيه ضيفي إليه كمية من الجلسرين مساوية لكمية عصير الخيار اللي عندك، وضيفي إليه ملعقة الدقيق.
بعد ما تجهزي الخليط ويكون بقى على شكل عجينة لينة حطيه على وشك وسيبيه لمدة 10 دقائق.
بعد مرور 10دقائق مرري قطعة مبللة بماء الورد على وشك وبعد كده اغسلي وشك بالماء الفاتر، وهتشوفي النتيجة.
 
 

Tags: , , , , , , , , , ,

May 28 2009

ماسكات طبيعية للبشرة الجافة

ماسكات للبشرة الجافة
************   

دي بقى مجموعة من الماسكات اللي تناسب البشرة الجافة، وإنتِ اختاري منها اللي متوافر ليكِ.

ماسك زيت الزيتون بالبيض
***********


المكونات:
صفار بيضة.
ملعقتان زيت زيتون.
ملعقة دقيق.
ملعقتان لبن طازج.

الطريقة:
اخلطي المكونات دي كلها مع بعضها، وبعد كده حطيها على وشك وسيبيها لمدة ربع ساعة، وبعد كده اغسلي وشك بالماء الدافئ كذا مرة وهتشوفي النتيجة.


ماسك عسل النحل بالخميرة
**************


المكونات:
ملعقة عسل نحل.
ملعقة حليب طازج.
خميرة بيرة.

الطريقة:
اخلطي المكونات السابقة مع بعضها البعض، وبعد كده ضعي الخليط على وشك باستخدام فرشاة، وبعد كده سيبيه على وشك لمدة ربع ساعة، ثم اغسلي وشك بالماء الدافئ أكتر من مرة لغاية ما تلاقي إن الماسك مابقاش له أي أثر على وشك.

وعلى فكرة الماسك ده غير إنه بيفيد البشرة قوي، فهو كمان بيمدها بفيتامين "ب"؛ علشان كده بنلاقي إن كل بيوت التجميل بتستخدمه.

 

ماسك الكمثرى
***********


المكونات:
ربع ثمرة كمثرى.
بياض بيضة.
نصف ملعقة عسل.

الطريقة:
افرمي الكمثرى جيدا وضيفي إليها خليط من العسل والبيض وامزجي كل المكونات دي مع بعضها وحطيها على وشك لمدة ربع ساعة، ثم اشطفي وشك بالماء الفاتر.

بس كده دي كانت مجموعة الماسكات اللي تفيد البشرة الجافة جربيها وعلقى وقولي لينا على النتيجة، وكمان لو عندك وصفة ياريت إنك تقولى لينا عليها.

 

Tags: , , , , , , , , , , ,

May 28 2009

ماسكات طبيعية للبشرة الدهنية

ماسكات للبشرة الدهنية
     

وطبعا زي ما إنت عارفة إن البشرة الدهنية محتاجة عناية خاصة وده لإنها بتتميز بحساسيتها الشديدة..

علشان كده بنلاقي إن أنسب أنواع الماسكات اللي تنسابها هي الماسكات دي.


ماسك الطماطم
***********
وطبعا مفيش بيت مافيهوش طماطم، وهتسأليني وتقولي ليه الطماطم بالذات؟ هاقول ليك علشان الطماطم بتتميز بمفعولها القابض للبشرة. وبكده يمكن الاعتماد عليها في تضييق مسام الوجه.

المكونات:
ثمره طماطم.
قشر نصف ليمونة.
عصير ليمون.

الطريقة :
اهرسي ثمرة الطماطم وضيفي إليها بشر قشر الليمون وعصير الليمون.
وبعد كده حطي الماسك على وشك لمدة ربع ساعة، ثم اشطفي وشك بعد كده بالماء الفاتر.

 

ماسك الردة
**********
المكونات:
ردة.
ماء ورد.

الطريقة:
ضيفي ماء الورد إلى الردة لغاية لما تلاقيها أصبحت على شكل عجينة لينة.. حطيها على وشك ورقبتك لمدة ربع ساعة.

بعد مرور ربع ساعة افركي هذا الخليط من على وشك بس خلّي بالك إن عملية الفرك دي تكون بلطف.

وميزة القناع ده إنه بيقضى على الخلايا الدهنية الميتة وبيعمل على إزالة الدهون الزائدة من على البشرة، وكمان بيكون له تأثير واضح في إزالة التهابات البشرة وتلطيفها.

ده بالإضافة إلى أن ماء الورد بيضفي على البشرة انتعاش وتلطيف ورائحة جميلة قوى.. أكيد لما تجربيه هتشعري بده.

 


ماسك شرائح الخيار
***********
وده بيعتبر من أسهل أنواع الماسكات وهو عبارة عن إنك تقطعي شرائح الخيار وتغطي بيها وجهك لمدة ربع ساعة، وبعد كده شيليها واغسلي وجهك بالماء الدافئ اللي مضاف إليه ماء الورد وهتشوفي النتيجة بنفسك.

ماسك الخميرة
************
المكونات:
خميرة بيرة (هتجيبيها من عند أي فرن أو حلواني).
ماء ورد.

الطريقة:
اخلطي الخميرة البيرة مع ماء الورد، بس خلّي بالك إنك تحصلي على قوام غليظ يشبه العجينة، وادهني بيها وشك ورقبتك على الأقل لمدة ربع ساعة.

وبعد كده اشطفي وشك بالماء الدافئ كذا مرة لغاية ما تتأكدي إنه مافيش أي أثر للخميرة على وشك..

بس كده دي كانت مجموعة من الماسكات اللي تناسب البشرة الدهنية، جربيها وقولينا على النتيجة، ولو كنتِ عارفة أنواع أخرى علقى وقولي لينا عليها.
 
 

Tags: , , , , , , , , , , ,