May 28 2009

الماسكات وإزاى تحطى ماسك

ماسكات طبيعية مية في المية

بعد ما اتكلمنا عن البشرة وأنواعها والمزايا والعيوب اللي في كل نوع
 

فاحنا المرة دي بنتكلم عن الماسكات الطبيعية اللي تناسب كل نوع من أنواع البشرة، وكمان ممكن إنك تعمليها في البيت من غير ما تكلفك أي حاجة خالص لأنها بكل بساطة مكوناتها موجودة عندك في البيت وبالتحديد في المطبخ..
 

ده طبعا بالإضافة إلى إن الماسكات دي مافيهاش مواد كيمائية ممكن إنها تضر بشرتك..

 

 يعني من الآخر كله طبيعي في طبيعي..


ازاي تحطي الماسك

  ***********************

قبل ما نتكلم عن الماسكات عايزة أقول لك على كام حاجة كده مهمة قوي تخلي بالك منها وإنتِ بتحطي الماسك، وده بيساعد إن الماسك ينجح ويجيب تأثيره إن شاء الله..

والحاجات دي مش صعبة خالص بس إنتِ خلي بالك منها..

وهي:

1. وإنتِ بتحطي الماسك مش محتاجة حد يقول لك إنك تحطي المسك على وجهك مع تجنب المنطقة اللي حول العينين والفم، وطبعا اوعي تنسي تحطيه على الرقبة من الأمام والخلف.


2- كمان اوعي تنسي إنك تنضفي بشرتك كويس قبل وضع الماسك، وده بيكون بإنك تغسلي وشك بالماء والصابون، بس خلّي بالك إن الصابون ده يكون بيناسب نوع بشرتك.

3- فيه حاجة حلوة كمان ممكن تعمليها، وهي إنك تبلي فوطة بماء ساخن وتحطيها على وجهك شوية لمدة 5 دقائق قبل ما تحطي الماسك.

ودي فايدتها إنها بتخلي مسام البشرة متفتحة وبالتالي تكون البشرة قادرة على إنها تتقبل الماسك اللي إنت هتعمليه بسهولة..
 
 

Tags: , , , , , , , , , ,

May 28 2009

أنواع البشرة وكيفية العناية بها(5)البشرة العادية

خامسا: البشرة الحساسة
*******************
البشرة الحساسة فيها شبه من البشرة الجافة من حيث جفاف الخدين واحمرارهم، بس أكثر حساسية منها وعلى فكرة البنت صاحبة البشرة الحساسة مترددة دائمة على طبيب الجلدية... علشان كده أنا مش هتكلم عن البشرة الحساسة بتفاصيل كتير لأن ده من تخصص أطباء الجلدية المتخصصين بس أنا ممكن أقولك نصائح عامة مفيدة للبشرة الحساسة العادية مش الحساسة اللي بتعاني من أعراض مرضية....
إزاي تتعرفي عليها؟!
البنت صاحبة البشرة الحساسة دي بتلاقي إن بشرتها صافية بس بتحمر بسرعة وفجأة وممكن تظهر لها بقع حمراء نتيجة التوتر أو أكلة معينة أو أي مرض حصل لها فبشرتها سريعة التأثر بالعوامل الداخلية والخارجية.. كمان بنلاقي إن البشرة الحساسة دي ملمسها دافئ شوية صيف أو شتاء..

أحيانا البنت صاحبة البشرة الحساسة بتعاني من ورم تحت الجلد أو انتفاخات كمان مابتقدرش تتعرض لأشعة الشمس بشكل مباشر وده لأن بشرتها بتتأثر بسرعة لدرجة إنها ممكن تسمر بمجرد إنها اتعرضت لأشعة الشمس لمدة أقل من ساعتين... وساعات كتير أوي تكون أشعة الشمس دي سبب في ظهور البقع السوداء على الجلد...

ومن ضمن مشاكل البشرة الحساسة إن فيه بعض الحالات من كثرة رقة الجلد بيظهر عروق حمراء على الوجه.
إزاي تعتني بيها في البيت؟!
صباحا ومساءء
بصفة عامة بانصح البنت صاحبة البشرة الحساسة بشوية الحاجات دي..

-1-
عدم الإفراط في النظافة وعدم فرك البشرة باليد أو باستخدام الفوطة وياريت ما تستخدميش الميه السخنة جدا في غسيل بشرتك لأن ده بيعرض البشرة للالتهابات وظهور الحبوب.
 

-2-
احرصي على النوم في غرفة جيدة التهوية مش كاتمة أو حر وما تفرطيش في التعرض للدفايات بصورة عالية.
 

-3-
لازم تستخدمي صابون طبي مخصص للبشرة الحساسة وكمان ما تستخدميش منظفات فيها دهون أو مواد منعشة وخليكي دايما حريصة على أن بشرتك تكون خالية من الكحول.
 

-4-
لو هتستخدمي أي كريم مرطب يبقى لازم الدكتور هو اللي يقولك عليه وعلى فكرة الكريم المرطب ده مفيد علشان بيعالج الجفاف اللي ممكن يصيب البشرة.
 

-5-
ماتحاوليش تحطي ماكياج كتير على بشرتك لأن بشرتك مش هتستحمله يعني كفاية تحطي روج خفيف وماسكرة وآي شادو وكحل.. يعني من الآخر كده لازم ماكياجك يكون مركز على ماكياج العين فقط وبلاش تحطي كريم أساس أو بودرة أو أحمر خدود...
 

-6-
لازم بالليل تغسلي وشك بميه ساقعة وغسول ولو فيه بقايا ماكياج تشيليها بمرطب "نيفيا"... وممكن تستخدمي ماسك مرطب مرة في الأسبوع ويكون الماسك ده من مستحضرات التجميل الخاصة بالجلد الحساس المرهف... ولو ممكن تقفلي شبابيك العربية لأن الهوا بيأثر في البشرة جدا.

Tags: , , , , , , , , ,

May 28 2009

أنواع البشرة وكيفية العناية بها(4)البشرة المختلطة


رابعا: البشرة المختلطة
**********************
أحيانا بيكون فيه نوع بشرة بتجمع بين إنها حساسة أو دهنية أو جافة وساعات ده كله بيبقى مع بعض علشان كده بنقول إن فيه بشرة مختلطة ودي تنقسم إلى "مختلطة جافة" و"مختلطة دهنية"..
إزاي تتعرفي عليها؟!
لو كنت عايزة تعرفي إذا كانت بشرتك مختلطة ولا لأ يبقى أول ما تصحي من النوم اغسلي وشك وبعدين استني ساعة وبعدين هاتي ورق كلينكس وحطيه على كل وشك لو لقيتي إن البشرة عند منطقة الخد لم تطبع أي دهون على المنديل وإن فيه دهون على المنديل مكان الأنف والذقن والجبهة يبقى بشرتك مختلطة دهنية... ولو حسيتي إن بشرتك ناشفة شوية أو محمرة زيادة عن اللزوم ومنطقة الأنف والذقن والجبهة هي اللي بتلمع تبقى بشرتك مختلطة جافة.
إزاي تعتني بيها لو كانت دهنية مختلطة؟!

لو كانت بشرتك دهنية مختلطة يبقى المفروض تمشي على النقاط دي..
1. تبعدي عن الكريمات اللي فيها دهون أو زيوت.



2. تحرصي أن يكون عندك كريمات مخصوصة للبشرة الدهنية المختلطة. 3. في الصباح تغسلي وشك بغسول جيل مناسب لنوع بشرتك وعلى فكرة الغسول ده بينشف الوش وبيخليه خالي من الدهون بس اللي ما توصلش لدرجة الجفاف...بعد كده استخدمي كريم خاص بالبشرة الدهنية المختلطة خالي من الدهون.
4. بالليل استخدمي مزيل الماكياج علشان يشيل أي أثر للماكياج خصوصا من على العين وبعدين الكريم المرطب الخالي من الدهون وعلى فكرة الكريم ده هو نفسه اللي بتستخدميه الصبح.
5. لو حصل لبشرتك أي تغيير مفاجئ مثل ظهور الحبوب في الجبهة أو الذقن فده بيكون نتيجة عوامل نفسية أو اضطراب في المعدة أو توتر عصبي أو اقتراب ميعاد الدورة الشهرية أو نتيجة استخدام الماكياج بكثرة وعدم إعطاء البشرة فرصة لكي تتنفس.... وفي الوقت ده لابد إنك تغسلي وشك بصابون طبي وتوقفي استخدام الماكياج يومين على الأقل وتستخدمي المطهر بالليل وخاصة اللي زي المضاد الحيوي وممكن تستخدمي الماسك الشفاف "بيل أوف" موجود في الصيدليات وده بيتحط على الوش ولمدة ربع ساعة وممكن تغسلي وشك بالليل بصابون مطهر، وبعد كده الجلد هيتعافى بالتدريج وبعدين ممكن تستخدمي الكريمات العادية اللي كنتي بتستخدميها قبل الحبوب.. ومتحاوليش تلعبي في الحبوب دي نهائي.
إزاي تعتني بيها لو كانت مختلطة جافة؟!

البشرة في الوقت ده بتكون دهنية عند الأنف والجبين والذقن لكن منطقة الخدود جافة شديدة الاحمرار... وده راجع للتعرض المستمر للتكييفات في الصيف والدفايات في الشتاء فده بيحول البشرة العادية إلى مختلطة جافة وبيزود من ظهور التجاعيد حتى لو كنتِ في سن الثلاثين.
وترجع أسباب التحول ده نتيجة خلو الجسم من المياه الكافية بسبب خروجها من الجلد وإنك ما شربتيش مية كتير في المقابل، فيبدأ الجلد في الانهيار لأنه بيحاول يرطب نفسه بس مش لاقي المية الكافية لذلك, وكمان لو استخدمتي الصابون العادي ده بينشف الخد فياريت تستخدمي الطبي.
ويعتبر أحسن حل للبشرة دي هو إننا نحاول نعتني بيها أكثر بحيث لا ينقصها أي دهون في الوجه فنستخدم مرطب الصبح وبالليل ونراعي عدم نقص المياه في الجسم فلازم نشرب مية كتير.
وبصفة عامة...ممكن تنظفي بشرتك المختلطة الجافة باستخدام مزيل لماكياج العين في الصبح وبعدين تغسلي بشرتك بغسول البشرة المختلطة الجافة وبعد كده تتنشفي بفوطتك بطريقة التربيت ومش بعنف وبعد كده تحطي الكريم المرطب الخاص للنهار خصوصا في الصيف لأن البشرة بتنشف أكثر, وبعد كده تحطي الماكياج بطريقة خفيفة بس تتأكدي إن كريم الأساس فيه دهون وممكن تستخدمي ماركة زي "نيفيا" أو "برجوا" أو "كيرولان"... وبالليل ممكن تشيلي الماكياج بقطنة باستخدام مزيل الماكياج وكمان تحطي كريم الليل الغني بالفيتامينات تحت العين قبل النوم..

Tags: , , , , , , , , ,

May 28 2009

أنواع البشرة وكيفية العناية بها(3)البشرة الجافة


ثالثا: البشرة الجافة
*****************
تتميز البشرة الجافة بأنها رقيقة وغير لامعة وعندها مسام رفيعة أوي وكمان بتبقى خشنة في منطقة الخدين والكفين والقدم وبتتأثر بدرجة الحرارة المرتفعة...
إزاي تتعرفي عليها؟!
تقدري تتعرفي على بشرتك بأنك تحطي إيدك تحت خدك هتحسي إن بشرتك ناشفة شوية ومافيهاش أي تدرجات ومش مرنة وكمان ماسكة نفسها...كمان البشرة الجافة بتبقى خشنة في ملمسها أول ما تغسليها بالمية والصابون وعلى فكرة البشرة الجافة ممكن تبقى شديدة الجفاف لو كنت بتحطي كريم باستمرار كل يوم وفجأة توقفتي لمدة أسبوع..

كمان البشرة الجافة ممكن يظهر فيها الاحمرار والبقع بعد تنظيفها بقوة أو نتيجة استخدام ماسك قوي وممكن تظهر فيها خطوط تجاعيد بسيطة عند العين أو خطوط حمراء رفيعة ومن عيوب البشرة دي إنها بتظهر فيها التجاعيد مبكرا بعد سن الثلاثين...
إزاي تعتني بيها في البيت؟!
صباحا ومساءً

ياريت البنت اللي بشرتها جافة تخلي الاهتمام بيها جزء من حياتها اليومية وتنظفيها الصبح وبالليل علشان تتجنب أي مشكلة ممكن تتعرض لها بشرتها وتحافظ عليها من ظهور التجاعيد مبكرا..
في الصباح...
المفروض البنت اللي بشرتها جافة ما تستخدمش المية والصابون كتير في غسيل وشها، وياريت تنظفها بكريم مرطب مثل "نيفيا" عن طريق استخدام قطنة تحط فيها الكريم وبعدين تعمل عملية تدليك خفيفة بالقطنة والكريم لمنطقة الذقن والقورة والخد...وبعد كده تجيب فوطة وتحطها تحت المية السخنة وبعد كده تحطها على بشرتها علشان تنظف بشرتها وتمسح بيها الكريم من على الوجه.

وعلى فكرة المفروض البنت اللي بشرتها جافة تحط كريم مرطب قبل ما تحط الماكياج خصوصا تحت العين وعلى الخدين أو ممكن ترش على وشها مية ساقعة جدا لأن ده بيساعد على إنعاش البشرة وبيثبت الماكياج وبيخليه شكله حلو أوي.
في المساء...
مهم جدا استخدام مزيل ماكياج لإزالة الماكياج خاصة ماكياج العين وممكن تستخدم بعده مناديل كلينكس عليها زيت لوز وتحطها على وشها وبعد كده تدلك وشها بأطراف أصابعها وبعد كده ممكن تستخدم قطنة محطوطة فيها ماء ورد ساقع وتدلك بيها بشرتها بحركات دائرية علشان الدورة الدموية تمشي في الجلد.
وفيه حاجة حلوة ممكن البنت تعملها وهي إنها تستخدم زيت اللوز كبديل لكريم العين وده عن طريق إنها تجيب زيت اللوز وتحط عليه نقطتين زيت زيتون وتعمل تدليك للمنطقة اللي حوالين العين بإديها من الداخل للخارج باتجاه عكس عقارب الساعة وده بيخلي عينيها تبان مرتاحة ونضرة تاني يوم الصبح.
وبصفة عامة بنصح البنت اللي بشرتها جافة إنها تشرب 3 أكواب من المية بعد ما تخرج من الحمام علشان تعوض الميه اللي بيفقدها جسمها بعد الحمام وتقلل على قد ما تقدر من شرب الشاي والقهوة ولو شربت أي حاجة من دي تشرب قصادها كوباية ميه، بالإضافة لذلك أنصحها إنها تنام نوم مستقر وهادئ على موسيقى هادئة لمدة 7 أو 8 ساعات على الأقل فقلة النوم والإرهاق تساعد على إظهار التجاعيد في البشرة وخصوصا الجافة...
كمان لازم البنت اللي بشرتها جافة تستخدم صابون طبي يناسب نوع بشرتها الجافة.

Tags: , , , , , , , , , ,

May 28 2009

أنواع البشرة وكيفية العناية بها(2)البشرة الدهنية


ثانيا: البشرة الدهنية
****************
من أهم سمات البشرة الدهنية أن التجاعيد مش بتظهر فيها مبكرا ..
إزاي تتعرفي عليها؟!
هتقدري تتعرفي عليها من خلال مظهرها العام فلو بصيتي في المرايا هتلاقيها بتلمع، وممكن تلاقي فيها شوائب بعد 3أو4 دقايق من التنظيف... وكمان ممكن تلاقي دهون على الجبين والذقن والأنف "منطقة التيزون"، بالإضافة إلى أن المسام المفتوحة بتبقى في الأنف وكمان في الخد.... كمان البشرة الدهنية بتتميز بظهور حبوب على الخد والذقن والجبين بشكل مفاجئ...
وفيه اختبار ممكن أي بنت وهي قاعدة في البيت تعمله علشان تعرف إذا كانت بشرتها دهنية أم لا وهي إنها تجيب كلينكس "منديل ورق" وتحطه على بشرتها لمدة خمس دقائق لو لقت إن المنديل فيه زي بقع دهنية يبقى كده هي بشرتها دهنية.
مشاكل البشرة الدهنية.. كل مشكلة وليها حل!!

البنت اللي بشرتها دهنية بتعاني من مشاكل كتير أوي زي مثلا مشكلة البقع اللي بتظهر حوالين الخد والشفايف وأحيانا بتظهر حبوب على الظهر والكتف والخدود...كمان بتظهر مساحات جافة على الخدين بسبب نقص عامل الترطيب الطبيعي في البشرة ومشاكل تانية كتير زي مثلا...
مشكلة لمعان الماكياج
صاحبة البشرة الدهنية دايما بتعاني إن ماكياجها على طول بتظهر فيه لمعة بعد نص ساعة من وضع الماكياج وده بيحصل لأنها بتستخدم ماكياج فيه نسبة عالية من الدهون وبالتالي بيزود الدهون في البشرة ويخليها بتلمع أوي علشان كده ياريت البنت اللي بشرتها دهنية ماتحطش ماكياج كتير لأنه بيزود الدهون على البشرة أو تختار ماكياج خالي من الدهون.
مشكلة ظهور حب الشباب
ودي مشكلة بتعاني منها بنات كتير أوي وعلاجها بيكون عند دكتور جلدية متخصص علشان يشوف الحبوب دي ويحدد نوعها ويحدد العلاج المناسب وعلى فكرة حب الشباب بيظهر نتيجة حدوث التهاب في الغدد اللي تحت الجلد..
ظهور حبوب صغيرة بيضاء
أحيانا بتظهر حبوب صغيرة بيضاء ودي تقدر إنها تتخلص منها باستخدام الإبر الخاصة بالأنسولين ودي بتتعمل عند دكتور جلدية متخصص أو خبيرة تجميل وما تحاولش تلعب فيها نهائي.
إخفاء الحبوب
من ضمن المشاكل اللي بتعاني منها البنت اللي بشرتها دهنية هي مشكلة ظهور حباية أو اتنين بشكل مفاجئ في الوجه دي ممكن تداريها باستخدام "كريم أساس بسيط" أو "بان ستيك" من ماركة "كيولان" أو "برجوا" أو"نيفيا"... وممكن تستخدم الدرجة اللي بتفضلها على مكان الحباية فقط، ده في حالة لو كانت مستعجلة ورايحة مشوار وعايزة تداري الحباية..
المسام المفتوحة
بالنسبة لمشكلة المسام المفتوحة فدي علاجها إنها تغسل وشها بالميه الساقعة جدا وتبعد نهائي عن الميه السخنة....

وممكن كمان تمسح وشها بقطعة ثلج موضوعة في ورق كلينكس وتمررها على وشها وعلى فكرة الحركة دي بتقفل المسام خاصة في منطقة الذقن والأنف...كمان ممكن تفرك وشها بقطنة فيها "تونيك" وده لأن "التونيك" بيساعد على قفل المسام...
وده كمان ماسك قابض ممكن تعمله وهو عبارة عن (ملعقتين نشا + ملعقة مية ورد ساقعة) تخلطهم مع بعض وتحطهم على بشرتها لمدة 10 دقايق وبعدين تشطف وشها بالميه الساقعة. وده بيساعد على قفل المسام المفتوحة..
إزاي تعتني بيها في البيت؟!
صباحا ومساءً

أحسن طريقة للعناية بالبشرة الدهنية...
في الصباح....
غسيل البشرة بالميه والصابون وده لأن مفيش أحسن من الميه والصابون للبشرة الدهنية وعلى فكرة الصابون بيقوم بمثابة علاج للبشرة الدهنية لأنه بيخلصها من الدهون وبيخلي ملمسها عادي... وغير مستحب للبشرة الدهنية استخدام كريم الصباح خاصة لو كانت البشرة دي فيها حبوب ويا ريت البنت في الوقت ده تحط بدل منه الغسول أو تكتفي بالميه والصابون, ولو ماكانش فيه حبوب ممكن تستخدم الكريمات الخالية من الدهون....
في المساء...
برضه أحسن حاجة هي غسيل البشرة بالصابون والميه ولو كانت البنت صاحبة البشرة الدهنية بتعاني من وجود حبوب يبقى من الأفضل عدم وضع كريم بالليل علشان الكريم بيساعد على زيادة الحبوب وتستعيض عن الكريم ده بالأدوية المطهرة اللي بيقول عليها الدكتور أو الصيدلي لتطهير الحبوب والدهون.
وبصفة عامة البنت اللي بشرتها دهينة لازم تهتم كويس أوي بتنظيف الفرش والبدارات والإسفنجات الخاصة بالماكياج يوميا أو يوم بعد يوم بالميه والصابون وتسيبها تنشف لغاية تاني يوم.. وده علشان تحمي نفسها من ظهور الحبوب المفأجاة لأن فيه أوقات كتير أوي بيكون سبب ظهور الحبوب دي هو تلوث أدوات الماكياج....
 

Tags: , , , , , , , , ,